Кондак 1

Избранному во иереех, дивному угоднику Божию Иоанну, пастырю и учителю, Царей любителю, скорбных утешителю, земли Российския светлому светильнику, все житие свое на служение Богу и ближним посвятившему, и многия грешники на покаяние обратившему: многим же болящим исцеление у Бога испросившему, составим похвалу, яко ходатаю нашему и скорому помощнику. Ты же, отче, яко имеяй дерзновение ко Господу, от всяких нас бед свобождай, да зовем ти хвалебно: Радуйся, Иоанне, новый Российский светильниче, и теплый о нас к Богу молитвенниче.

Икос 1

Ангела хранителя своего, еще шестолетен быв, в светлости неизреченней яве узрел еси, Иоанне, иже и рече тебе, яко по повелению Господню всегда невидимо соприсутствует и хранит тя от всяких зол. Темже от юности избранника Божия тя ведуще, взываем сице:

Радуйся, от младенства по предуведению Богом избранный: радуйся, от юности в служении Ему Того благодатию призванный.
Радуйся, Ангела хранителя твоего издетска добрыми нравы веселивый: радуйся, николиже того чим опечаливый.
Радуйся, яко незримый хранитель твой яве тебе явися:
радуйся, яко той всегда хранити тя обещася.
Радуйся, благочестивых родителей чадо возлюбленное:
радуйся, теми издетска в страсе Божием воспитанный.
Радуйся, воздержанию от юности себе обучивый:
радуйся, во убожестве и нищете младыя дни своя препроводивый.
Радуйся, яко благонравия твоего ради благодать Божия яве на тебе почиваше:
радуйся, яко та лице твое всегда благоумиленно творяше.
Радуйся, Иоанне, новый Российский светильниче, и теплый о нас к Богу молитвенниче.

Кондак 2

Видим тя, богомудре Иоанне, от юна возраста благодатию Божиею осененна бяше, и ею таинственно на добродетельное житие наставляема и руководима. Темже, имуще тя себе во образ и подражание, умиленно вопием Христу Богу: Аллилуиа.

Икос 2

Разум твой измлада в чтение и разумение Священнаго и святоотеческаго Писания углубил еси, Иоанне, и из негоже, яко губа, восприимаше еси воду живу, от источника Духа Свята точимую. Темже молим тя: умоли Благаго Господа, да сподобит причастниками быти сея живительныя струи и нас взывающих ти сице:

Радуйся, от младенства чиста себе от страстей соблюдавый:
радуйся, благодать святаго крещения целу и невредиму сохранивый.
Радуйся, чтение Божественных писаний усердно возлюбивый:
радуйся, сокровенный в них смысл право и добре уразумевый.
Радуйся, во учении книжнем прилежание примерное показавый:
радуйся, в любомудрии естественнем и духовнем славно преуспевавый.
Радуйся, любомудрием твоим мира прелести скоро распознавый:
радуйся, тех сетей, яко орля высокопаривый, мудре избежавый.
Радуйся, северныя Российския страны чудное и светлое воспитание:
радуйся, мрака греховнаго в людех разгнание.
Радуйся, всем притекающим к тебе скорое вспоможение подаваяй:
радуйся, многомощное нам пред Богом заступление являяй.
Радуйся, Иоанне, новый Российский светильниче, и теплый о нас к Богу молитвенниче.

Кондак 3

Сила благодати Божия, оскудевающая восполняющая, обильно излияся на тя, Иоанне приснопамятне, егда от святителя Христофора во иерея рукоположен был еси, и граду Кронштадту пастырь учинен: оттоле бо начал еси учити люди верно служити Святей Троице и пети Ей: Аллилуиа.

Икос 3

Имея любовь Божественную в сердце своем, мудре Иоанне, и устав поста строго соблюдая, удобь поборал еси страстей двизания, николиже теми запявся. Темже, яко муж силен, изшел еси на делание нивы Господни: словом, яко ралом, разрыхляя отвердевшая и оледеневшая сердца человеческая, согревая же та молитвою и теплотою любве твоея, и насевая в них семена искренняго покаяния и живыя веры. Сего ради восписуем ти таковыя похвалы:

Радуйся, избранный сосуде Божия благодати:
радуйся, даров небесных вместилище.
Радуйся, всем сердцем и всем помышлением своим Бога возлюбивый:
радуйся, сего ради и чада твоя духовная искренне того любити учивый.
Радуйся, заповеди Божия и уставы Церкве о постех опасно хранивый:
радуйся, таковым хранением любовь твою к Богу и ближним делы проявивый.
Радуйся, от юности над страстьми воцаривыйся: радуйся, славен победитель над теми явивыйся.
Радуйся, в мире поживый премирно: радуйся, на земли мудрствовавый небесно.
Радуйся, Царства Православно-Российскаго столпе неподвижимый:
радуйся, православия и добрых обычаев блюстителю непозыблемый.
Радуйся, Иоанне, новый Российский светильниче, и теплый о нас к Богу молитвенниче.

Кондак 4

Бурею многих бед и волнений житейских одержимым нам, помогай, отче Иоанне, якоже и в животе твоем помогал еси всем, с верою к тебе притекавшим, да вси тобою вспомоществуеми, благодарно о тебе поем Богу: Аллилуиа.

Икос 4

Слышав апостола глаголюща: наше бо житие на небесех есть и хотя е наследовати, маловременное сие житие не во угождении плоти и работе страстем иждил еси, Иоанне, но во очищении души от скверн греховных, с ними же никтоже может внити в Царствие Небесное. Темже имуще тя во образ богоугоднаго жития и помощника в сем, взываем сице:

Радуйся, света евангельскаго в земнем бытии светлое блистание: радуйся, омраченных душ вседейственное просвещение.
Радуйся, яко в Божественная писания весь ум твой углубил еси:
радуйся, яко в них стезю правую в Царствие Небесное обрел еси.
Радуйся, яко вся деяния твоя свет миру беша:
радуйся, яко тобою Отец Небесный дивно прославися.
Радуйся, яко слово твое не бе якоже кимвал звяцаяй, мертво, нечувственно:
радуйся, яко тое бяше воистинну живо и действенно.
Радуйся, яко тобою мертвии духом веры оживляются:
радуйся, яко тобою падшии в бездну греховную к покаянию возбуждаются.
Радуйся, яко яви тя Господь земли Российстей аки пророка и апостола: радуйся, яко в тебе врази истины обретоша неустрашимаго обличителя и крепкаго противоборца.
Радуйся, Иоанне, новый Российский светильниче, и теплый о нас к Богу молитвенниче.

Кондак 5

Звезда многосветлая земли Российския явился еси, священне Иоанне, мрак греховный просвещающая. Темже и ныне подаждь просвещение сыновом Российским, тьмою заблуждения объятым и во власть нечестивых предавшимся, да познают свое окаянство, и обратившеся ко Господу, в покаянии возопиют Ему: Аллилуиа.

Икос 5

Видевши Российстии народи великаго тя благочестия проповедника, и многомощнаго пред Богом молитвенника и предстателя, во множестве отовсюду к тебе притекаху, инии же писания своя тебе, отче, посылаху, исцеления в болезнех, советы в недоумениих и утешения в скорбех просяще: и улучивше желание, благодарственно тебе взываху:
Радуйся, Иоанне, новый миру светильниче:
радуйся, непосредственный в молитвах Богу собеседниче.
Радуйся, яко твоя молитвы сильны и многомощны Владыку умилостивляти:
радуйся, яко твое к Нему предстательство многодейственно благодать Его на щедродательство подвизати.
Радуйся, яко тобою, по мере веры, подаются благодатная исцеления:
радуйся, яко тобою недугующии приемлют скорое болезней своих в здравие пременение.
Радуйся, яко тобою грешнии на покаяние обращаются: радуйся, яко тобою безчиннии крамольницы вразумляются.
Радуйся, яко тобою безумнии глумителие над тайнами веры посрамляются:
радуйся, яко тобою посмеятелие чудесных твоих деяний подобающее вразумление приемлют.
Радуйся, скорбящих благодатный утешителю:
радуйся, в недоумении сущих благостный вразумителю.
Радуйся, Иоанне, новый Российский светильниче, и теплый о нас к Богу молитвенниче.

Кондак 6

Проповедником истины, богоносным отцем подражая, всего себе на служение Богу и ближним вдал еси, и сан священства нося, покоя не знал еси, службы Божия в храме присно совершая, и в домех верных молебныя пения воспевая, нуждающимся же щедро благотворя, наименование благотворца и безсребренника стяжал еси, Иоанне. Темже и по успении твоем Российстии людие прославляют имя твое, и вечную память тебе возглашающе, поют Богу: Аллилуиа.

Икос 6

Возсиявый от Девы Христос Бог наш, и тму идолобесия светом Евангелия разгнавый, яви тя, отче Иоанне, верна и ревностна проповедника Своея истины, клевретами лукаваго извращаемую. Темже, яко имеяй дерзновение ко Господу, избави от тех злобы и коварства всех воспевающих ти таковая:
Радуйся, служителю Христов изрядный:
радуйся, во иереех угодниче Того преизящный.
Радуйся, яко на стражи дома Божия недремленно стоявый:
радуйся, яко татей духовных мечем слова Божия и молитвою отгнавый.
Радуйся, писаньми твоими многих от любве мирския к любви Христовой подвигнувый:
радуйся, вещаньми твоими любовь Божию к человеком, во искуплении и промышлении нам явленную, изъявивый.
Радуйся, действие Духа Божия на сердца человеческая удобопостижно сказавый:
радуйся, тайну молитвеннаго с Богом собеседования яве указавый.
Радуйся, целомудрие в законном супружестве твоем чудесно сохранивый:
радуйся, многая чада духовная покаянием породивый.
Радуйся, в сердцах верных благую память по себе оставивый:
радуйся, яко память сия, аки праведника, пребудет вовек почитаема.
Радуйся, Иоанне, новый Российский светильниче, и теплый о нас к Богу молитвенниче.

Кондак 7

Хотя Всеблагий Господь утешити верныя люди Своя, и отвратити беззаконныя от злых дел их, воздвиже тя, Иоанне, якоже пророка Иону Ниневии граду великому: да проповедаеши людем гнев Божий, грядущий на ня вскоре, еже и собыстся уже по твоему вещанию: ибо непокаяни в гордыни пребыша, и не восхотеша с тобою смиренно пети Христу Богу: Аллилуиа.

Икос 7

Нова беда и гнев Божий постиже нас, не восхотевших внимати богодухновенным твоим глаголом: держава бо царства нашего разрушися, и слугам сатаны во власть предадеся, иже честныя обители иноческие разориша, святыя храмы оскверниша, и вся благочестивыя люди люте озлобиша, и множество духовнаго и мирскаго чина мученической смерти предаша. Темже к тебе, отче Иоанне, в покаянии прибегаем и умильно взываем: умоли Владыку Христа, да преложит гнев Свой на милость и да услышит нас, взывающих ти сице:
Радуйся, покаяния велегласный проповедниче:
радуйся, грядущаго гнева Божия на люди согрешившия неложный провозвестниче.
Радуйся, нечестия людскаго громогласный обличителю: радуйся, о исправлении тех ревностный рачителю.
Радуйся, Царства Православно-Российскаго при животе твоем крепкий оплот бывый:
радуйся, от крамол во дни оны тое сохранивый.
Радуйся, Царей благочестивых присный любимче:
радуйся, мудрый тех советниче и наставниче.
Радуйся, о власти царстей, яко богоуставленной, многая словеса провещавый:
радуйся, к послушанию и верности законной той власти люди тщаливо призывавый.
Радуйся, молитвами твоими престолы Царей благочестивых ограждаяй:
радуйся, суды правы в людех творити тех поучаяй.
Радуйся, Иоанне, новый Российский светильниче, и теплый о нас к Богу молитвенниче.

Кондак 8

Странный и необычный путь жития совершил еси, отче Иоанне: в мире бо пожив премирно и на земли небесно: в воздержании и целомудрии, и во всегдашнем Бога славословии великим отцем подражал еси. С нимиже ныне на небесех Христу в веселии предстоя, и молитвы о мире принося, выну поеши: Аллилуиа.

Икос 8

Вси православнии людие, якоже в животе, тако и по преставлении твоем к Богу, вельми чтут тя, отче Иоанне, верующе, яко велие дерзновение к Богу имаши, и молиши благость Его о всех к тебе притекающих, и тако взывающих:

Радуйся, благаго корене доброе прозябение: радуйся, отца клирика и матере благочестивыя рождение и воспитание.
Радуйся, яко малая весь Сура, твоего ради в ней рождения всей земли Российстей ведома сотворися:
радуйся, яко град Кронштадт твоим в нем служением прославися.
Радуйся, яко милосердыми делы твоими вся земля Российская наполнися:
радуйся, яко весть о чуднем и святем житии твоем и за пределы ея распространися.
Радуйся, яко писаньми твоими тайна благодатнаго с Богом общения изъясняется:
радуйся, яко сими писаньми свет духовнаго озарения в сердца чтущих я изливается.
Радуйся, яко в писаниих твоих чистота души твоея яве прозревается:
радуйся, яко в них якоже в зерцале, богоподобие души человеческия отображается.
Радуйся, яко писаниями твоими не токмо российстии, но и инороднии людие во спасение свое назидаются:
радуйся, яко ими истинная вера возсиявает и мраки ересей разгоняются.
Радуйся, Иоанне, новый Российский светильниче, и теплый о нас к Богу молитвенниче.

Кондак 9

Всякое слово не довлеет к похвале твоей, отче Иоанне, ты бо Духом Святым движим от юности Богу усердно послужил еси: первее в изучении священных писаний многа лета усердно труждаяся и разум глубок стяжевая, таже о научении отроков и о пастве твоей прилежно пекийся, всех поучая еси разумно пети Богу: Аллилуиа.

Икос 9

Витии суемудрии, Лев безумный и единомысленницы его, тобою, отче Иоанне, яве посрамишася в злочестии своем, православнии же в вере утвердишася, боговещанными твоими глаголы наставляеми, темже, восхваляюще тя, взываем сице:
Радуйся, цевнице боговещанная: радуйся, гусли Духа Святаго сладкозвучныя.
Радуйся, словесы и писаньми твоими догматы веры уяснивый:
радуйся, вещаньми твоими верных смыслы в православии утвердивый.
Радуйся, яко тобою полки богоборцев победишася:
радуйся, яко тобою яснополянский богоотступник и клевреты своя мудро изобличишася.
Радуйся, яко тобою душепагубное того учение о душе человечестей, аки бы не имущей личнаго бытия, низложися:
радуйся, яко тобою истинное учение о безсмертии и лично безконечнем пребывании ея утвердися.
Радуйся, разума Божественнаго мудрый изъявителю:
радуйся, таинств церковных благоговейный совершителю.
Радуйся, благонадежный в Царствие Небесное руководителю: радуйся, пути спасительнаго истинный учителю.
Радуйся, Иоанне, новый Российский светильниче, и теплый о нас к Богу молитвенниче.

Кондак 10

Спасти хотя душу твою, многия добродетели в себе совокупил еси, отче Иоанне: апостольское и святоотеческое веры исповедание, мученическую в благочестии твердость, всегдашнее в молитвах бодрствование, воздержание и смирение, вкупе же и подвиги преподобных. Темже ныне, со святыми на небеси водворяяся и непрестанно Бога славословя, поминай нас, славную память твою почитающих и поющих Богу: Аллилуиа.

Икос 10

Царя Небеснаго усердный священнослужителю и земных благочестивых царей верный чтителю и любителю, отче Иоанне: обема праведно благоугодивый, воздая убо кесарева кесареви, а Божия Богови, и томужде поучал еси вся люди. Сего ради восхваляем тя и глаголем сице:

Радуйся, рабе Божий, благий и верный:
радуйся, служителю Того усердный.
Радуйся, вся повеленная от Господа тщаливо творивый:
радуйся, заповедей Его искусный делатель бывый.
Радуйся, о вездесущии Божии всегда помышлявый:
радуйся, умныма очима твоима Того выну созерцавый.
Радуйся, благочестивых Царей Российских яко слуг Божиих почитавый:
радуйся, благими советы и молитвами твоими в крестнем их подвизе народоправления помогавый.
Радуйся, к попечению о блазе Церкве и народа своего Тех подвизавый:
радуйся, от крамол и мятежей в животе твоем Тех защищавый.
Радуйся, и ныне о Царстве Православно-Российстем Бога умоляяй: радуйся скиптры царей православных утверждаяй.
Радуйся, Иоанне, новый Российский светильниче, и теплый о нас к Богу молитвенниче.

Кондак 11

Песней похвалою невозможно есть изобразити множество о Бозе дел твоих, о пречудне отче Иоанне, яже совершил еси во всем житии твоем: немощныя молитвами твоими исцеляя, бесы от человек изгоняя, пиянством и иными страстьми недуговавшия врачуя, в нищете же и убожестве сущия обильно ущедряя: и всем по коегождо потребе помогая и благотворя, яко всем благодарно о тебе пети Богу: Аллилуиа.

Икос 11

Светильника светла и прозорливца дивна яви тя Господь во днех наших, провозвестивша грядущий гнев Его на Царство Православно-Российское, зане отступихом от веры отцев, прельстившеся велеречием клевретов отца лжи, и непокаяхомся проповедию твоею. Темже яко пророка Божия и провозвестника Того судеб, ублажаем тя и в покаянии взываем:

Радуйся, провидче дивный: радуйся, будущих событий предсказателю неложный.
Радуйся, древним покаяния проповедником равный: радуйся, новым провидцем равночестный.
Радуйся, сокровенных судеб Божиих яснозрителю:
радуйся, грядущаго гнева Божия на нераскаянныя грешники возвестителю.
Радуйся, покаяния сладкогласный глашателю:
радуйся, смятенных сердец умирителю.
Радуйся, многомощный наш пред Богом ходатаю:
радуйся, благонадежный наш пред Ним предстателю.
Радуйся, добрый словесных овец пастырю, многия заблудшия душ взыскавый:
радуйся, от уз темничных и смерти многихя свободивый.
Радуйся, Иоанне, новый Российский светильниче, и теплый о нас к Богу молитвенниче.

Кондак 12

Благодать Божия, юже приял еси сугубо во святем крещении и во иерейстем рукоположении, не вотще в тебе бысть, отче Иоанне: рачением бо твоим употребил еси на пользу многим и во славу Дародателя ея: светлостию бо жития твоего и делы милосердными вельми прославися Отец Небесный, и от множества уст, тобою духовно и телесно облагодетельствованных, возносится Тому великая песнь: Аллилуиа.

Икос 12

Поюще богоугодное твое от юности житие, и духовное от силы в силу восхождение, ублажаем праведную твою кончину и славное погребение благодатных твоих мощей, обретших вечный покой в созданней тобою девичей обители. Веруем же, яко и святая душа твоя радуется в пресветлых райских селениих, ихже наследовати помози и нам возглашающим ти похвалы сицевыя:

Радуйся, течение временныя жизни мирно и богоугодно скончавый:
радуйся, веру правую непорочно сохранивый.
Радуйся, мирною христианскою кончиною праведность твою известивый:
радуйся, покой вечный на Небеси со святыми получивый.
Радуйся, радости праведных во обителех небесных причастивыйся:
радуйся, со множеством душ тобою спасение улучивших, блаженства вечнаго сподобивыйся.
Радуйся, с царственными страстотерпцы Царство Небесное наследивый:
радуйся, с ними Царю славы предстояй, и о избавлении отечества нашего от безбожных враг молитвы возносяй.
Радуйся, великий православия поборниче:
радуйся, неодолимый благочестия защитниче.
Радуйся, сонными явленьми преславно чудотворяй:
радуйся, инославныя в православие приводяй.
Радуйся, яко святыя мощи твоя источают многая исцеления:
радуйся, сбытие надежды нашея всемирнаго твоего со святыми прославления.
Радуйся, Иоанне, новый Российский светильниче, и теплый о нас к Богу молитвенниче.

Кондак 13

О всечестный отче Иоанне, не Кронштадтский токмо, обаче и всероссийский, паче же всемирный светильниче и великий Христов угодниче! Приими от нас недостойных хвалебное сие пение, и благоприятными твоими к Богу молитвами избави нас от бед временных и вечных: да сподобимся с тобою в Царствии Небеснем вечно воспевати: Аллилуиа, Аллилуиа, Аллилуиа.

Этот кондак читается трижды, затем икос 1 и кондак 1

Молитва

Отче Иоанне досточудне! Ты добродетельми многими к Богу приблизился еси и дарований духовных от Него сподобился еси: недуги врачевати, страсти прогоняти и скорби утоляти. Темже смиренно молим тя: подаждь недугом нашим исцеление и страстем врачевание, находящия же на ны скорби утоли, и радость духовную в сердца наша всели. И помози нам подражательми быти святаго твоего жития и всех благих твоих деяний, яко да сподобимся с тобою наследия Царствия Небеснаго.
Отечеству нашему мира и любве у Господа испроси, благоденствие ему возврати: скиптры благочестивых царей наших возстави и на многая лета утверди: да вси познают и уразумеют, коль велие имаши у Бога дерзновение, и прославят тебе ради всесвятое и великолепое имя Пресвятыя, единосущныя и нераздельныя Троицы, Отца и Сына и Святаго Духа, Единаго по существу Бога, Емуже честь и поклонение подобает в безконечныя веки веков. Аминь.

Тропарь, глас 5.

Благодати тезоимените, и тою от юности обогатился, молитвенник земли Российския богоприятен, и Царем благочестивым премудр советодатель был еси, Иоанне пречудне. Темже моли Христа Бога, Державу Российскую, с Царем благочестивым в мире и благоденствии сохраняти, и душам нашим даровати велию милость.

Кондак, глас 3.

Любовию Божественною из млада уязвився, мирских сластей и сожития законныя супружницы уклонился еси, отче Иоанне. Сего ради ликом девственников на Небесех сочислился еси, с нимиже молися Христу Богу умирити мир и спасти души наша.