Кондак 1-й
В бранех победный, в дни мира спасительный Кресте честный христианское знамение, Тя величаем, Тебе покланяемся и восписуем хвалы благодарственные. Ты же одеян небесною силою нас сохрани, да зовем Тебе радостно:
Радуйся, Живоносный Кресте, благочестия непобедимая победа!
Икос 1-й
Крест всечестный окружают незримо днесь умозрители Ангели в страхе и благодать светоносную видяше явно. Ныне обильно даемую верным, благоговейно стояще зовут таковая:
Радуйся, Кресте Ты знамя победное
Радуйся, чудо умом неисследное
Радуйся, Ангельским взором Твой свет удивление
Радуйся, демонским зраком Твой вид уязвление,
Радуйся, радость премирных обителей,
Радуйся, горесть подземных мучителей,
Радуйся, небом явленное миру видение,
Радуйся, горняго света над миром горение
Радуйся, лествица к небу возведшая
Радуйся, облако к свету приведшее
Радуйся, Божие в дольний мир ты снисхождение
Радуйся, смертнаго в горний рай ты восхождение
Радуйся, Живоносный Кресте, благочестия непобедимая победа!
Кондак 2-й
Распятый на древе Христос Вседержитель, древо проклятия древом спасения дивно являет и обладаем Божественной Силой многою, Крест искупления, знамя победы, страшное злым, благодатное верным, иже Крестом осеняеми Богу поют - Аллилуиа.
Икос 2-й
Емлются верою силы Христовы, царь Константин в поле браннем моляся, видев же образ Креста в час полудня изображенный на небе звездами и надписание дивное "Сим побеждай", весь вдохновенный к Нему вопиет таковая:
Радуйся, Кресте звездами сияющий,
Радуйся, сильный врага побеждающий,
Радуйся, щит и броня в битве воинству бранному
Радуйся, град и стена в мире братству избранному
Радуйся, Кресте, Ты миру хранение,
Радуйся, мирный вражды разрушение
Радуйся, огненный меч силу тьмы посекаюший
Радуйся, пламенный серп ниву зла пожинающий,
Радуйся, стран и народов хранение,
Радуйся, сел и градов ограждение,
Радуйся, очи мои просвещающий верою
Радуйся, сердца мое озаривый надеждою
Радуйся, Живоносный Кресте, благочестия непобедимая победа!
Кондак 3-й
Силу Креста разумевше царица Елена, сына желание тщится исполнити скоро: Крестное Древо под прахом земли обрести и явити пред миром источник Святыни. Тем же к Распятому сердце и ум возводяши, тепле молитвенный глас вопием. Аллилуиа!
Икос 3-й
Треблаженное древо Креста созерцати желая, повелевает царица Елена служащим: "Крест Жизнодавца ищите усердно, в недрах земли утаенный издревле", сама же стоящи взывает к Нему таковая:
Радуйся, Кресте, начало спасения
Радуйся, светлый, заря искупления.
Радуйся, дланей Христовых благое простертие
Радуйся, в смерти явивый и жизнь, и бессмертие.
Радуйся, выси небес разверзающий,
Радуйся, в бездне врага сокрушающий.
Радуйся, ног Жизнодавца Святое подножие.
Радуйся, людем открывый смотрение Божие.
Радуйся, миру Ты камень сумнения.
Радуйся, Церкви Ты слово спасения,
Радуйся, Ты погибающих паки взыскуеши.
Радуйся, Ты обольщаемым путь указуеши.
Радуйся, Живоносный Кресте, благочестия непобедимая победа!
Кондак 4-й
Ужас объемлет людей ожидавших, егда от земли изнесено бысть древо честное, и в той же час сила Креста показася предивно - мертвец бо воскресе Крестом осененный и, видевши страшное чудо, возопиша Богу хвалебную песнь: Аллилуиа!
Икос 4-й
Трепетно радуется перед народом святая Елена в день, егда дивно обретается древо честное и востече возвестити царю превеликую радость. Сей же, царю-псалмопевцу подобяся, духом торжество ваше, ликуя пред Богом, хвалы воздвизая Кресту таковая:
Радуйся, Кресте земли осенение
Радуйся, чудный небес украшение.
Радуйся, в море далече Ты пристань хвалимая.
Радуйся, в безднех воздушных Ты сила незримая.
Радуйся, стрелы во дни отвращающий,
Радуйся, страхи в ноши отгоняющий,
Радуйся, воздух и воды Крестом освящаются.
Радуйся, буря и пламень Крестом укрощаются.
Радуйся, в бурю пловцам Ты спасение,
Радуйся, в скорби Ты всем утешение.
Радуйся, сущим в пути Ты звезда путеводная
Радуйся, сушим в морях Ты стезя мореходная
Радуйся, Живоносный Кресте, благочестия непобедимая победа!
Кондак 5-й
Видети Крест Жизнодавца желающе, людие вси умолиша Святителя, да подъемля высоко, покажет народу блаженное Древо, взем же святитель своими руками, Крест воздвизает, и вси велегласно Богу молитвенным гласом поют: «Господи помилуй» и припевают священную песнь: Аллилуиа!
Икос 5-й
Огнезрачен в мире Крест воздвизаем явися и освешаеми им, вернии вси веселятся, зряще Его яко Виновника благ, тем же Ему покланяемся ныне и вопием похвалы таковая:
Радуйся, Кресте рай вечныя сладости
Радуйся, дивный дар Божия благости
Радуйся, Ты воздвизаемый нас воздвизаеши
Радуйся, Ты поклоняемый нас освящаеши
Радуйся, вышняго града взыскание
Радуйся, вечныя правды сказание
Радуйся, Ты в дни скорбей нам отрада любимая
Радуйся, Ты в годы бед нам стена нерушимая
Радуйся, к Богу ты мир привлекаеши
Радуйся, стадо Христу собираеши
Радуйся, веры лампада Тобою светлеется
Радуйся, пламень молитвы Тобою возвеется
Радуйся, Живоносный Кресте, благочестия непобедимая победа!
Кондак 6-й
Единодушно под кровом Креста да пребудем, Его же держаще, яко же воин оружие брани, сим победим врагов веры нашествия и лобызаюше древо честное, священное, Богу немолочную песнь вопием: Аллилуиа!
Икос 6-й
Мощь разрушив нерушимую ада, светом Своим озаряет Христос сущих в юдоли плачевной и мрачной, и, нетерпяще небеснаго света, адовы силы падоша с диаволом вкупе, вси же спасения видевши Крест изыдоша в радости, славу поюше преславному древу:
Радуйся, Кресте оружие дивное
Радуйся, знамя диаволу страшное
Радуйся, Ты еси адовых уз расторжение
Радуйся, Ты еси смертных оков низвержение
Радуйся, входы рая отверзающий
Радуйся, смерти врата сокрушающий,
Радуйся, страсти Христовы в сердцах обновляющий
Радуйся, всем воскресения славу являющий
Радуйся, Божие в мир снисхождение
Радуйся, с Богом людей примирение
Радуйся, Ты безотрадных отрада желанная
Радуйся, Ты безнадежных надежда единая
Радуйся, Живоносный Кресте, благочестия непобедимая победа!
Кондак 7-й
Умудренному Богом вождю Моисею, хотящу народ свой изъяти от горькия муки, жезл путеводный во образ Креста подается. Ведый же силу Креста издалеча, в страхе пророк вопияше хвалу: Аллилуиа!
Икос 7-й
Плоть восприявшее Отчее Слово, грех человека на рамо подъемлет и на Кресте умирает Сын Божий, грех наш и клятву, и смерть пригвождает, да вопием Ему тепле, Креста восхваляше силу:
Радуйся, Кресте Ты падших восстание
Радуйся, Крепкий Ты грешных воззвание
Радуйся, прелесть и грех на Тебе пригвождается
Радуйся, плоть со страстьми на Тебе распинается
Радуйся, Ты еси образ смирения
Радуйся, Ты еси иго терпения
Радуйся, Ты нам Христову любовь знаменуеши
Радуйся, Ты совершенство в любви указуеши
Радуйся, наших печалей отгнание
Радуйся, наших скорбей врачевание
Радуйся, в час наказания нас укрепляющий
Радуйся, в день испытания нам помогающий
Радуйся, Живоносный Кресте, благочестия непобедимая победа!
Кондак 8-й
Образ смирения Спасова видевши, иго благое Его восприимем: мира отвергшеся к небу воспрянем, ибо безгрешный распятся на древе, да нас к высоте привлечет, вопиющих к Нему: Аллилуиа!
Икос 8-й
Крест милосердие Божие к людям являет, Божий бо Сын воплотися от Девы, в рабии образе с нами живет и подъемлет наш грех нестерпимый и страждет безгрешный до смерти, нас оживляя Крестом благодатным. Ему же ныне поем таковая:
Радуйся, Кресте Ты честь милосердия
Радуйся, грозный Ты суд жестосердия
Радуйся, нищие духом Тобою взыскуются
Радуйся, кротции сердцем Тобою красуются
Радуйся, милость Тобою является
Радуйся, правда Тобою свершается
Радуйся, Ты умирати за ближняго учиши
Радуйся, Ты возлюбити врага наставляеши
Радуйся, Крест и любовь нам хваление
Радуйся, месть и вражда нам стыдение
Радуйся, Ты на земли в путь прискорбный нас водиши
Радуйся, многую мзду в небесах нам готовиши
Радуйся, Живоносный Кресте, благочестия непобедимая победа!
Кондак 9-й
Любвеобильно пришел к человеку Спас и Избавитель мира Христос, руце Свои простирает на древе, всю собирая вселенную вкупе, к горним чинам приводя естество человека, Богу поющее вечную песнь: Аллилуиа!
Икос 9-й
Адовы силы не могут прияти тайну Креста Твоего, Жизнодавче, како Распятый и смерть претерпевый, смертию смерть разрушаеши сильне, мы же поем Воскресения Славу и Креста Твоего благодать и державу зовуще: Аллилуиа!
Радуйся, Кресте Ты мудрость примерная
Радуйся, чудный Ты святость безмерная
Радуйся, Бог бо воскресе к Тебе пригвоздивыйся
Радуйся, мир бо спасеся Тебе покоривыйся
Радуйся, Кресте Ты солнце вселенныя
Радуйся, слава и честь вожделенная
Радуйся, Ты под крыле свое мир собираеши
Радуйся, Ты бо главою небес досязаеши
Радуйся, Кресте Ты сильных падение
Радуйся, крепкий смиренных восстание
Радуйся, Ты тишину нам Христову являеши
Радуйся, нашу вину Ты на век упраздняеши
Радуйся, Живоносный Кресте, благочестия непобедимая победа!
Кондак 10-й
Наше растленное все естество обновляя, Единородный Сын Божий Сын Девы бывает и страждет на древе нас ради бесстрастный, и смерть восприемлет да нас оживит, светло поюших Воскресшему песнь: Аллилуиа!
Икос 10-й
Яко державный покров и основу вселенныя зрим Тя, о Кресте Христов Живоносный, ибо Создатель небес и земли Вседержитель руцы свои на Тебе простирает за грех наш, всех научая Тебе воспевати:
Радуйся, Кресте Ты мира хранение,
Радуйся, мощный земли утверждение
Радуйся, новый бо рай на земли утверждаеши
Радуйся, в смертной юдоли нам жизнь водружаеши
Радуйся, жезле великого пастыря
Радуйся, скиптре Христа Вседержителя
Радуйся, веры, надежды, любви сочетание
Радуйся, правды Христовой и мира вещание
Радуйся, совесть Крестом озаряется
Радуйся, воля Крестом управляется
Радуйся, чуждым Ты мудрость во век необъемлемая
Радуйся, верным Ты радость во век неотъемлемая
Радуйся, Живоносный Кресте, благочестия непобедимая победа!
Кондак 11-й
Единодушно Тя славяще песньми святыми, Кресте Христов, миру радость и слава, како возможем достойно воспети бездну даров и чудес Твоих тайну. Тем же Тебе покланяемся присно, Богу поюще немолчную песнь: Аллилуиа!
Икос 11-й
Многообразна честнаго Креста благостыня, сей бо хранит основание веры, сей единение Церкви связует, сей освящает исходы и входы, тайно вводя нас в небесное Царство, научая о Бозе Ему воспевати:
Радуйся, Кресте Ты слава церковная
Радуйся, крепкий Ты сила духовная
Радуйся, всем Ты святый во Христе единение
Радуйся, всем Ты благий во Христе обновление
Радуйся, Кресте Ты знамя крещения
Радуйся, Кресте печать искупления
Радуйся, сад напоенный пречистой кровию
Радуйся, меч изощренный Христовою страстию
Радуйся, имя врагу нестерпимое;
Радуйся, пламя во век негасимое;
Радуйся, Ты наш обет от купели крещения
Радуйся, Ты наш залог до зари воскресения
Радуйся, Живоносный Кресте, благочестия непобедимая победа!
Кондак 12-й
Светом сияет нам Крестное древо, светом водящи в юдоли плачевной, веру приемлет, надежду внедряет, в сердце любовь возгревает святую и научает взывати во дни и в нощи: Аллилуиа!
Икос 12-й
Яко на светоч в нощи безрассветной, дух мой унылый на Тя уповает, Кресте Христов, Живоносная сила, горняго града взыскуя, но вверженный долу, очи свои возвожу к высоте Твоей дивной и, преклоняя колена души же и тела, бренный и блудный взываю Ти тако:
Радуйся, Кресте Тебе поклонение
Радуйся, чудный Тебе мое пение
Радуйся, смертным Ты путь к небесам указуеши
Радуйся, горних с земным Ты союзом связуеши
Радуйся, иго смиренным любезное
Радуйся, бремя надменным полезное
Радуйся, в море скорбей Ты отрада желанная
Радуйся, в бурю страстей тишина благодатная
Радуйся, в жизни мое Ты стяжание
Радуйся, в смерти мое увенчание
Радуйся, Кресте храни нас в молитве взывающе
Радуйся, Кресте спаси нас Тебе воспевающих
Радуйся, Живоносный Кресте, благочестия непобедимая победа!
Кондак 13-й
О! Многопетое, О! Живоносное, О! Треблаженное Древо Креста. К Тебе яко живу взываем смиреннии. К Тебе проливаем мольбы недостойнии. Укажи нам грешным путь жизни спасительный. И в страшный час смерти нам буди прибежище. Огради от мрачных и вечных мучений. Да к царствию Света приидем поюще: Аллилуиа! Аллилуиа! Аллилуиа!
Затем повторяется: Икос 1-й и Кондак 1-й
Молитва первая
О, всесвятый и всечестный Кресте Господень! Прежде презренное и постыдное орудие казни, ныне же почитаемый и прославляемый, яко оружие спасения! Како по достоянию твоему возмогу воспевати тя? Како восприиму дерзновение принести тебе мое поклонение, аз грешный и недостойный? Точию неизреченное человеколюбие пригвожденнаго на тебе Богочеловека Христа Спасителя нашего укрепляет мя немощнаго. Сего ради, надеяся на снисхождение Его, вопию тебе: Радуйся, Кресте, основание Церкве, вселенныя утверждение, прибежище верным! Крест — демонов истребление, нечестивых погубление, неверных вразумление! Крест — дев целомудрие, Крест — праведных облегчение, заблуждающихся путь, безстыдных раскаяние, неимущим богатство, плавающим кормчий, слабым сило, сражающихся охранение, сирот питатель, вдов заступниче, неимущим упования, единая точию надежда! Ты еси воистину древо познания, на немже Единородный Сын Божий искупил еси неизмеримые долги неблагодарнаго человека Богу и Создателю его; ты еси жезл Моисеов чудотворяй, иже отверзе нам путь в рай, услаждаяй скорби наши, исцеляяй болезни наши. Ты еси Соломонов одр, на нем же царственный от Иуды Лев, плотию уснув воскресе тридневен во славе, яко победитель ада. Сего ради по достоянию воспеваю и прославляю тя, Богоблаженнейший Кресте, всею душею своею в вечер и заутра и во дни, полагая на тя все упование спасения моего. Аминь.
Молитва вторая
О всечестный и животворящий Кресте Господень, кровию Христа Бога нашего освященный! Ты еси знамение победы на враги наша видимыя и невидимыя; Ты имаши явитися в час страшнаго суда Христова. Тебе смиренно поклоняюся, честно прикасаюся и любезно тя лобызаю, нынешнее моление к Распятому на тебе принося, да исцелит мя силою в тебе Своею от всех недуг душевных и телесных, и сохранит от враг видимых и невидимых, и неосужденна на суде Своем одесную поставит. Ей, животворящий Кресте святый! На тебе Спас, умирая за умершия грехми человеки, дух Свой яко человек испусти, кровь же и воду источи, и сими треми едино, еже паче всех есть на потребу, спасение нам содела, во славу источника вод живых, Бога Отца, Себе же от кровей девических воплощенна Бога Сына, и Бога Духа Святаго, оживляющаго дух человечь, Ихже триех во едином Божестве славити и мне пособи от воды крещения восприятою верою непорочною, во причастии же плоти и крове Господних надеждою несумненною, и в покаянии духом сокрушенным, и любовию нелицемерною, да тако не токмо в жизни сей плачевней, яко вода мимотекущей, но и в будущем блаженнем животе прославлю Господа, пособием силы твоея, Кресте треблаженне, и поклонюся Ему самым лица зрением Верованному, одержанием же Чаянному и наслаждением Любимому, единому в Троице славимому в безконечныя веки веков. Аминь.
Тропарь, глас 4
Спаси, Господи, люди Твоя, и благослови достояние Твое, победы православным христианом на сопротивныя даруя, и Твое сохраняя Крестом Твоим жительство.
Кондак, глас 4
Вознесыйся на Крест волею, тезоименитому Твоему новому жительству, щедроты Твоя даруй, Христе Боже. Возвесели нас силою Твоею, победы дая нам на супостаты, пособие имущим Твое, оружие мира, непобедимую победу.