Кондак 1
Избранный угодниче Христов, пречудне отче наш Паисие, ради нашего спасения и нравов века сего исправления от Бога дары благодати и чудотворения приявый, и ради Иисуса Сладчайшего, любовию ко всему миру горящего, всеусердно подвизавыйся, просим тя: сподоби нас в покаянии души обновляти, яко да с благодарностию приносим величания сия:
Радуйся, преблагословенне отче наш Паисие, в Бозе вся путие жизни нашея устрояющий!
Икос 1
Ангелов Творец произрасти тя, прехвальне Паисие, от священней земли Каппадокийстей, идеже прежде тя велиции просияша угодницы Божия подвизи и служением пастырским, высотою и совершенством добродетелей своих; ты же их примерам следуя любовию к ближним твоим и всему роду человеческому прославил Милосерднаго Отца нашего Небеснаго. Сего ради и мы восхваляем тя сице:
Радуйся, богомудрым последователем святых Каппадокии себе сотворивый!
Радуйся, в стяжании истины Господней им всецело последовавый!
Радуйся, присноцветущая ветве райская, аромат благоухания духовнаго нам источающая!
Радуйся, источниче благодати небесней, весь мир спасительным учением наполняющий!
Радуйся, трапезо сладчайшая, души гладныя, преславно насыщающая!
Радуйся, благотворная житнице, вся наши печали, заботы и слабости в себе принимающая!
Радуйся, звездо лучезарная, на небосклоне Церкви Христовой, свет спасительный нам посылающая!
Радуйся, маяк присногорящий, путь в нетленные чертози Отчии нам озаряющий!
Радуйся, преблагословенне отче наш, Паисие, в Бозе вся путие жизни нашея устрояющий!
Кондак 2
Предвидя Премудрый Господь наш величие святыни твоея, о преславне отче Паисие, от утробы матери твоея предизбра тя, дабы сотворити тя избранным и многоценным сосудом божественной благодати, яви в тебе источник надежды и полноводную реку милосердия Своего; сего же ради, мы, прославляя Бога, Дивнаго во святых Своих, вопием Ему о тебе: Аллилуйя!
Икос2
Разумом богопросвещенным свыше одарен бе святый преподобный и богоносный отец наш Арсений Каппадокийский, от рук коего ты, всехвальне Паисие, крещение святое, и в лета отрочества наставление в вере и благочестии приявый; Старец же провидя дары духовныя, иже имея тебе Господь открытии благослови тя и наследником святости свое ятя сотвори. Мы же, велию праведность твою воспевая, просим тя купно со святым Арсением, вознеси молитвы твоея ко престолу Всесвятыя Троицы, а от ны прими благосклонно величания сия:
Радуйся, от святаго Арсения Каппадокийскаго святое крещение приявый!
Радуйся, просвещение о славном будущем твоем от него услышавый!
Радуйся, образ благий жития богоугоднаго от него усвоивый!
Радуйся, предстательство за себя и в житии и по кончине угодника сего с радостию восхвалявый!
Радуйся, в наставления старца сего в меру возраста Христова возрастивый!
Радуйся, свидетельства о его богоугодном житии и чудесех с верою и надеждою собиравый!
Радуйся, от его святынь исцеления неисчетныя и помощь благодатную принимавый!
Радуйся, с любовию его святые мощи в твоей обители, иже в Сутори положивый!
Радуйся, преблагословенне отче наш Паисие, в Бозе вся пути жизни нашея устрояющий!
Кондак 3
Силою злочестивых правителей турецких понуждаемые, родители и соотечественницы твоя, прехвальный Паисие, преселися суть из восточныя страны Каппадокийския в пределы западныя Конитския, идеже ты, достохвальне отче, начал еси преславное восхождение твое по лествице совершенства духовнаго; яко еще во дни детства твоего явился еси источником света для всех, вокруг тебе сущих, иже видевши драгоценныя дарования твоя, воспеша всех благ духовных Подателю: Аллилуйя!
Икос 3
Имуще пред очима твоима благий пример родителей богобоязненных, прехвальне Паисие, от дней детства твоего познал еси животворящую силу благодати Божия, и образ будущего совершенства явил еси в себе, наставлениям благочестивой матери твоея усердно следуя; и был дитятию возрастом, обаче старец душею; мы же умиляемся преславному просветлению сердца твоего, со радостию воспеваем тя сице:
Радуйся, в часы юности твоея скоротекущия страсти мира сего отринувый!
Радуйся, благосовершенным постничеством драгоценный венец непорочности стяжавый!
Радуйся, во дни младости твоея дар непрестанной молитвы приявый!
Радуйся, от игрищ и забав детских в созерцание мира Христова удаливыйся!
Радуйся, милость Господа, возвеселяющаго младость, к юношам заблудшим приклоняющий!
Радуйся, укрепление в целомудрии и благочестии девам христианским дарующий!
Радуйся, родителей и наставников в мудрости детоводительства утверждаяй!
Радуйся, всем нам в меру возраста Христова во всяком обстоянии восходити помогаяй!
Радуйся, преблагословенне отче наш Паисие, В Бозе вся путие жизни нашея устрояющий!
Кондак 4
Бурею помышлений сомнительных смущаемы, како по достоянию возможем пети тя, богоблаженне отче Паисие, яко Господь призва тя к защищению и обороне отчизны твоея и всего мира христианскаго от неверия во Христа, источника и смысла бытия человеческаго, яко ты исполнившись велию любовию к Богу и ближним, решительно и смело провозглашая еси истину Евангелия Христова, примером твоим укрепляя всех благовестников Божиих; мы же веру твою воспевая, на предстательство твое, за ны уповая, воспеваем Троице Святой и тебе: Аллилуйя!
Икос 4
Слышавши слова Господни, яко Царствие нудится и токмо нужницы восхищают е, усердно подвизался еси, богомудре Паисие, в борьбе не против плоти и крови, но против духов злобы поднебесной, неустанныя молитвы вознося и жертвы духовныя сотворяя Господеви обращения и спасения ближних и дальних твоих ради; и сего ради драгоценныя и нетленныя венцы от Творца нашего приял еси. Мы же многократныя воздаяния принося Христу, Дивному во святых Своих, жертву хвалы, тебя, отче всеблагий, величаем сице:
Радуйся, волны страстей и сомнений человеческих о камения веры разбивый!
Радуйся, пример совершеннаго и благаго самосовершенствования явивый!
Радуйся, блага земныя ради сокровищ Небесных оставивый!
Радуйся, в огне испытаний веру твою, аки злато в горниле, закаливый!
Радуйся, великодушием твоим свет, вся вокруг тя озарявый, источавый!
Радуйся, в годину смут, печалей и невзгод страждущим велию помощь твою сотворивый!
Радуйся, всем путем жития твоего образ жития во Христе нам показавый!
Радуйся, не токмо против недруг отчизны твоея, но и против врага спасения ратобортвовый!
Радуйся, преблагословенне отче наш Паисие, в Бозе вся путие жизни нашея устрояющий!
Кондак 5
Божественным светом озарена бе душа твоя, о прехвальный Паисие, яко во дни юности твоея отреклся еси от скоротекущих благ мира сего и всецело предал еси ся в руце Христовы, собирающия воинство иноческое. Ты бо, совершенное доверие стяжавше ко Спасителю и благодатию Его укрепившись, скоро стяжал еси совершенство духовное и стал еси ангелом земным, во Христа облекошеся, воспел еси Ему: Аллилуйя!
Икос 5
Видевше подвизи богоугодные отцев, на Синае подвизающихся, удалился еси, угодниче Христов, в богоспасаемую обитель сию, дабы верно и усердно Спасителеви тамо послужити. Ты бо, богомудре отче, преодолел еси страсти мирския и претворил еси себе в мужа совершенна в добродетелех и делании духовнем, ревностно горящим и подвизающимся ради Вечней Истины Божией. Милосердный же Господь обильно воздаде ти от неисчетных сокровищ и щедрот Своих. Мы же, вся сия ныне поминающее, величаем тя сице:
Радуйся, три лета многотрудно в пустынех синайстих подвизавыйся!
Радуйся, в сокровенней пещере хлад и зной кротце претерпевый!
Радуйся, человече небесный, всю суету и гордость житейскую низложивый!
Радуйся, злоухищрения и козни бесовстии упованием на Христа Распятаго победивый!
Радуйся, начаток всеусердных молений твоих о блазе всего мира тамо положивый!
Радуйся, светом Истины Христовой мрак греховный разгоняющий!
Радуйся, в покаянии обновляти и преображати души наша научающий!
Радуйся, всецелым доверием ко Христу души наша укрепляющий!
Радуйся, преблагословенне отче наш Паисие, в Бозе вся путие жизни нашея устрояющий!
Кондак 6
Проповедник милосердной любви Божия Матери к падшему роду человеческому явился еси , преподобне Паисие, егда по свершении подвигов твоих на Синае призван был еси Ею в земный вертоград Ея, на святую Гору Афонскую, идеже пребывая, от силы в силу восходил еси, благодарящее непрестанно Царицу Небесную ради пречуднаго Ея Покрова, коим осеняет Она весь мир, вызваляя его из мрака горестей, забот и страданий. Сыну же Ея всерадостно и неустанно воспевал еси: Аллилуйя!
Икос 6
Возсия на Горе Афонстей вертоград святых отец преподобных, их же примеру последовати желая, усердно подвизался еси, всехвальный Паисие, восходя по лествице добродетелей богоугодных, возрастая в праведности Христовей; подобно мудрой пчеле собирал еси духовный мед учений святоотеческих. От богомудраго старца Тихона наставление в делании духовном приял еси, следуя ему в послушании всесовершенном. Мы же восхождение к вершине святости воспети дерзая, вопием ти сице:
Радуйся, яко через тебе Всеблагий Господь славу святой Горы Афонстей возрасти!
Радуйся, яко новаго сына возлюбленнаго Всепречистей Матери Своея Иисус тя поручи!
Радуйся, богопросвещенным старцем Тихоном в делании духовнем укрепленный и утвержденный!
Радуйся, с велию любовию и всецелою самоотдачею авве твоему послуживый!
Радуйся, муж мудрый, Духом Святым движимый!
Радуйся, послеже и мнозих иных в вере и благочестии богомудро и пречудно возрастивый!
Радуйся, богомудрыя писания ради славы Христовой и пользы нашея оставивый!
Радуйся, от путей искушений и соблазнов чад твоих духовных оберегавый!
Радуйся, преблагословенне отче наш Паисие, в Бозе вся путие жизни нашея устрояющий!
Кондак 7
Хотяще в велицей и совершенней любови Творца нашего выну пребывати, сотворил еси себе, о богоносне отче Паисие, быти благим орудием Господним, яко через тебе со всею силою Своею яви Всевышний обновляющее милосердие и исцеляющее попечительство Свое для душ людских, во мраце греховнем сущих. Мы же, сия ныне поминающе, величаем и славословим Господа нашего, тебя, преподобне отче, аки спутника на дороге спасения нам дарованнаго, взывая: Аллилуйя!
Икос 7
Новый и преславный наставниче всему миру христианскому явился еси, о всеблагий отче Паисие, ты ревностно и свято последовал еси словесем Спасителя нашего, рекшаго: «яко узрят людие благия дела ваша», да прославят Отца вашего Небеснаго(Мф.5:16). На тебе же, отче наш, глаголы сия во всей силе своея свершилися, яко востекоша во след тебе мнозии и Христа обретоша. Мы же сия поминающее, на попечительство твое уповаем и возносим ти похвалы сия:
Радуйся, богомудрый наставниче, писаниями твоими в вере и благочестии нас утверждающий!
Радуйся, органе Духа Святаго, радость покаяния нам возвещающий!
Радуйся, пречудный пророче, язвы века сего пред нами обнажающий!
Радуйся, милосердный врачу, неисцельныя недузи побеждающий!
Радуйся, премудрый душепопечителю, от тяжких скорбей избавляющий!
Радуйся, елее благодатный, раны сердец наших заживляющий!
Радуйся, благоискусный пастырю, искушения бесовския от нас удаляющий!
Радуйся, целителю прехвальне, разобщенным семьям мир небесный и единение ниспосылающий!
Радуйся, преблагословенне отче наш Паисие, в Бозе вся путие жизни нашея устрояющий!
Кондак 8
Странное и страшное видение постиже тя, богоносне отче Паисие, яко неистово ратоборствует враг спасения человеческаго супротив семейств, Богом Всеблагим благословенных; сего же ради, препоясавшись Словом Истины возвестил еси супругом, яко токмо терпение и сострадание, смирение и самопожертвование принесут мир в домы их. Сего ради мы славословим Господа, чрез тебя, прехвальне отче Паисие, нам путь истины указующаго и вопием Ему: Аллилуйя!
Икос 8
Все благословения Своя дарует Господь наш семьям благочестивым, - тако научал еси духовных чад твоих, блаженный Паисие. И наставлению святителя Иоанна Златоустаго свято следуя, глаголавшего: «дайте мне матерей христианских, и взращу святых, иже весь мир преобразят», сему же поучал еси верныя супружества, яко мир в семье есть плод Духа Святаго и всем нам подобает стяжати мир в душе, да тысячи спасутся вокруг нас, и тебе покровителю и заступнику нашему небесному взываем сице:
Радуйся, всеединение в любви к Богу и ближним супругом дарующий!
Радуйся, семейных в благочестии и умеренности жития научающий!
Радуйся, мир и отраду родителем и чадом стяжати в таинствах Церкви наставляющий!
Радуйся, добрый пример жития богоугоднаго чадом подавати побуждающий!
Радуйся, девам и юношам укреплятися в целомудрии и уповании на милосердие Божие утверждающий!
Радуйся, самый помысел о детоубийстве во чреве о камень страха Божия разбивающий!
Радуйся, всякий грех, порушающий лад семейный силою Божией попирающий!
Радуйся, с любовию и бескорыстием нести тяготы друг друга побуждающий!
Радуйся, преблагословенне отче наш Паисие, в Бозе вся путие жизни нашея устрояющий!
Кондак 9
Всяческия беды, страдания душевныя и недузи телесныя далече от нас устраняеши, всехвальный чудотворче Паисие, и миром совершенным и радостию духовною наполняеши наши сердца обильно; сего ради мы, благодарение возсылаем ти, благий наш покровителю и предстателю пред престолом Божиим, и величаем, прославляем, превозносим Триипостаснаго Бога нашего, с отрадою в душе и надеждою воспевая Ему о тебе: Аллилуйя!
Икос 9
Вития многовещанныя и вси риторы благоискусныя не возмогут по достоянию воспети величие и животворную силу благодати Божия, явленной на тебе, преподобне отче наш Паисие, ибо ты еще на земли сый любовию и состраданием всеизобильно преисполнившись к людям, несчастиями и недугами измученным, всеусердно и сомаотверженно молился за них Отцу Небесному, научая за вся Его благодарити искренне. Ныне же в чертозех Царя Небесного сый, молися о всех паки и паки с надеждою взывающих ти сице:
Радуйся, скальпелю благий, тяжкую болезнь раковую побеждаяй!
Радуйся, неустанное попечение для страждущих болями невыносимыми являяй!
Радуйся, источниче исцеления, израненныя души наша возрождающий!
Радуйся, вся скорби, печали и заботы в горниле молитвы твоея попаляющий!
Радуйся, угле ладана небеснаго, злоухищрения демонов испепеляющий!
Радуйся, слабости и тревоги наша в силу духовную и мужество претворяющий!
Радуйся, в терпении и кротости стяжати венцы нетленныя нас научающий!
Радуйся, в суете жительствующих благодатно вразумляющий!
Радуйся, преблагословенне отче наш Паисие, в Бозе вся путие жизни нашея устрояющий!
Кондак 10
Спасение всего рода человеческаго устрояя, Всеблагий и Милосердный Христос, обетова воздаяние велие тем, иже желают возрасти в преподобии и правде ради совершенства ближних своих; на сие уповая, ты, святый отче Паисие, с радостию приял дары многообразныя от Духа Святаго, дабы наставити многих на путь спасения и единения со Христом, да поют вси Ему с надеждою: Аллилуйя!
Икос 10
Царь Небесный, Всеблагий Господь наш Иисус Христос, благоволи украсити тя обилием даров Своих, имиже ты, богомудре Паисие, послужил еси во славу Творца нашего и их же употребил еси на пользу человеком, став добрым отцем и благим наставником для несчетнаго полка верующих во Христа, искушениями века сего утомленных и гавани спасения взыскующих. Сице молим тя: сотвори и нас быти учениками Спасовыми и детьми духовными твоими, да величаем тя сице:
Радуйся, спасительною надеждою и путеводителем к Небесным вратам для многих бывый!
Радуйся, велиею мудростию твоею искушения и атаки бесовстии низлагавый!
Радуйся, одолевати помыслы злыя, врагом спасения нашего насажденныя, нам помогаяй!
Радуйся, плоды истиннаго покаяния в душах заблудших и неверных взращивающий!
Радуйся, даром различения духовных помыслов верных благодатно обогащающий!
Радуйся, благодатными дары твоими глубинныя раны сердец людских исцеляющий!
Радуйся, отчаявшихся и унылых благодатно в надеющихся на Господа преображающий!
Радуйся, в благости Отца нашего Небеснаго николиже сомневатися нас научающий!
Радуйся, преблагословенне отче наш Паисие, в Бозе вся путие жизни нашея устрояющий!
Кондак 11
Пение хвалебное возглашаем ти, богомудре отче наш Паисие, совершенства твоего монашескаго ради, яко ты, исполненный благодати Божия, стал твердою скалою надежды нерушимей для тех, кто всецело ся посвяти Господеви, ибо, виде созерцания и дарования твоя духовныя, иноци узреша в тебе, отче святый, наставника, Духом Святым одаренного. Мы же, сия убо поминающее, величаем и славословим Спасителя нашего, посылающего пастве Своей наставников святых и поем ему о тебе: Аллилуйя!
Икос 11
Свет благодати Христовой возсия во обители Суротийстей, идеже дщери твоя духовныя в трезвении и богообщении возрастали тобою, отче святый, в терпении и богомыслии наставляемыя и посвяшаша с любовию, надеждою и радостию житие свое иноческое Жениху Небесному. Мы же духовное водительство твое восхваляя, веруем, что и ныне ты не оставляеши всех нас без предстательства твоего и с надеждою воспеваем ти сице:
Радуйся, ревностным служением Господеви и любовию к ближнему образ истиннаго монаха явивый!
Радуйся, аки наставник духовный в монастыре святаго Иоанна Богослова просиявый!
Радуйся, в гавань спасения для душ, жаждущих Христа, обитель сию претворивый!
Радуйся, честных инокинь уневещивати души своея Господеви научавый!
Радуйся, сего ради подвизатися в борьбе со страстьми и похотьми их утвердивый!
Радуйся, искушения и паучину диавольскую, богомудро расточивый!
Радуйся, к частой исповеди и причастию, аки к благому орудию духовному прибегати подвизающий!
Радуйся, в наставлениях твоих истинный путь жития благаго и богопознания нам отверзающий!
Радуйся, преблагословенне отче наш Паисие, в Бозе вся путие жизни нашея устрояющий!
Кондак 12
Благодать Божия, великая и животворящая преобильно сниде и наполни тя, всеславный отче наш Паисие, яко явился еси драгоценным сосудом милосердия Божиего, к людям грешным, за коих ты, угодниче Христов, выну с великим самопожертвованием молил еси Троицу Всесвятую, удостоившую тя, присносияющаго венца чудотворца. Мы же радуемся и благодарим Всеблагаго Господа нашего, даровавшего нам тя, богоблаженне наш покровителю, и просим удостой и нас купно с тобою Царю Небесному воспевати: Аллилуйя!
Икос 12
Поюще святое и праведное житие твое, преподобне отче наш Паисие, величаем тя, светильниче Христов, аки еще на земли пребывая, приобщился еси радостей Царствия Небеснаго, иже приготови Господь для всех любящих Его и волю Его творящих; ты бо достоин сего явился еси, яко всеусердно послужил еси Богу и ближним твоим, с любовию велиею, яко претерел еси тяжкия искушения и нападки бесовския, обаче Всемилосердный Христос сподоби радосто и утешения Своего. Ныне же, по блаженней кончине твоей, стяжал еси благодать молитвы за ны, и сего ради просим тя: сподоби и нас радости духовныя и приими величания сия:
Радуйся, в чертозех Царя Небеснаго в славе неизреченней пребывающий!
Радуйся, со всеми святыми на трапезе Агнца Божия присноторжествующий!
Радуйся, плодами великой святости твоея к подвигом духовным нас вдохновляющий!
Радуйся, друже Христов и святых Его собрате, Богу «уста ко устом» вещающий!
Радуйся, златозарная лампадо, Христовом светом нетварным сияющая!
Радуйся, огне благодатный, любовь к Богу в сердцах наших возжигающий!
Радуйся, милосердие Приснодевы и Царицы ангелов к нам приклоняющий!
Радуйся, мрак скорбей светом радости побеждающий!
Радуйся, преблагословенне отче наш Паисие, в Бозе вся путие жизни нашея устрояющий!
Кондак 13
О преподобне и богоносне отче наш Паисие, сосуде драгоценный благодати Духа Всесвятаго, многия великия и преславныя чудеса во дни жития твоего и по блаженней кончине сотворивый, и многих христиан в делании спасительном утвердивый; ныне же во славе предстоя престолу Всесвятыя Троицы, предстательствуй о всех, во мраце духовнем и заблуждении сущих, да возлюбим Милосерднаго Господа нашего и сподобимся во веки Ему купно с тобою воспевати: Аллилуйя, аллилуйя, аллилуйя!
Тропарь преподобному Паисию Святогорцу, Глас 5.
Боже́ственныя любве́ о́гнь прие́мый, / превосходя́щим по́двигом вда́лся еси́ весь Бо́гови, / и утеше́ние мно́гим лю́дем был еси́, / словесы́ боже́ственными наказу́яй, / моли́твами чудотворя́й, / Паи́сие Богоно́се, / и ны́не мо́лишися непреста́нно // о всем ми́ре, преподо́бне.
Кондак преподобному Паисию Святогорцу, Глас 8.
А́нгельски на земли́ пожи́вый, / любо́вию просия́л еси́, преподо́бне Паи́сие, / мона́хов вели́кое утвержде́ние, / ве́рных к житию́ свято́му вождь, / вселе́нныя же утеше́ние сладча́йшее показа́лся еси, / сего́ ра́ди зове́м ти: // ра́дуйся, о́тче всеми́рный.
Молитва
О, святый преподобне и богоносне отче наш Паисие, возлюбленный наш покровителю и богомудрый наставниче, по лествице добродетелей возшедый от бытия земнаго в Царствие Небесное и получивый благодать предстательствовати за ны пред Троном Всемилосерднаго Господа нашего; сице молим тя: отврати нас от пути грехов наши и научи нас Господеви приноситисовершенныя плоды покаяния и обновления во Христе душ наших. Отче святый, во дни земнаго жития твоего многия тяжкия болезни и недузи неизцельныя уврачевавый, души от греха и скорбей страждующия исцеливый; ныне же предстоя пред Богом, преклони Его милосердие к нам, да твоего предстательства ради исцелит и нас, с любовию чтущих святую память твою, и дарует нам крепость в искушениих, мужество в борьбе с духом злобы, ищущим вечней погибели нашей, да дарует нам прощение всех наших грехов, иже от юности нашея до настоящего дня мыслию, словом и делом сотворихом, да научит нас, что подобает нам творити, дабы выну Ему служити, яко подобает ближним нашим с любовию и смирением служити. Ей, отче святый, настави нас, по примеру святаго жития твоего, любви и самопожертвования исполненнаго, отвергшись пут греховнаго жития, взыти к Небесным чертогам, идеже восхвалим Всемилосерднаго Триипостаснаго Господа нашего во веки веков. Аминь.